Draumaúrslitaleikur á Wimbledon

Það verður sannkallaður draumaúrslitaleikur í karlaflokki á Wimbledon mótinu í tennis á sunnudaginn þegar tveir bestu spilarar heims etja kappi. Þetta varð ljóst síðdegis þegar Rafael Nadal tryggði sér réttinn til að keppa við Roger Federer í úrslitum.

Spánverjinn Nadal vann 6-1 7-6 (7-3) 6-4 sigur á Þjóðverjanum Rainer Schuettler í dag, en sá þýski vann nauman sigur í maraþonviðureign í 8-manna úrslitunum í gær.

Nadal byrjaði leikinn vel í dag og vann fyrsta settið á aðeins 23 mínútum, en Schuettler barðist eins og ljón og náði að halda sínu nokkuð vel eftir það.