Federer úr leik á opna ástralska

Þau óvæntu tíðindi gerðust á opna ástralska meistaramótinu í tennis að Roger Federer mun ekki keppa til úrslita á mótinu.

Federer tapaði fyrir hinum tvítuga Novak Djokovic frá Serbíu og það í þremur lotum - 7-5, 6-3 og 7-6.

Djokovic vann bráðabanann í oddalotunni með sjö stigum gegn fimm.

Federer missir þar með af sínum fyrsta úrslitaleik á stórmóti síðan 2005 en alls hefur hann leikið til úrslita á síðustu tíu stórmótum og þar af unnið átta.

Hann var ekki upp á sitt besta í dag en undirbúningur hans fyrir mótið var erfiður vegna veikinda.

Það verður þó ekki tekið af Djokovic að hann lék gríðarlega vel í dag og átti sigurinn svo sannarlega skilinn.

Djokovic mætir Frakkanum Jo-Wilfried Tsonga í úrslitunum en hann sló út Rafael Nadal í undanúrslitunum.

Federer er í efsta sæti styrkleikalista Alþjóða tennissambandsins, Nadal í því öðru og Djokovic í þriðja sæti. Tsonga er í 38. sæti.