Bílaframleiðendur vongóðir um fjárstuðning

Bandarískir þingmenn ákveða í dag hvort hið opinbera veiti bandarísku bílarisunum General Motors og Chrysler fimmtán milljarða dala til að komast yfir erfiðasta hjallann og forða þeim frá gjaldþroti.

Fari bílarisarnir í þrot er hætt við að fall þeirra hafi mikil áhrif á bandarískt efnahagslíf.

Þingheimur vestanhafs hefur sett fram þá kröfu að verði fyrirtækjunum bjargað séu þau skikkuð til að leggja fram nýja rekstraráætlun í síðasta lagi í enda mars á næsta ári.

Fjárfestar eru nokkuð bjartsýnir á að fyrirtækið verði sér úti um aukafjárveitinguna. Það lýsti sér í nokkurri hækkun á gengi fyrirtækjanna á bandarískum hlutabréfamarkaði í dag.

Gengi bréfa í General Motors hefur nú hækkað um tæp þrjú prósent. Aðrir bílaframleiðendur hafa séð svipaða hækkkun á markaðsvirði félaganna í dag.

Þá hefur Dow Jones-hlutabréfavísitalan hækkað um 0,81 prósent og S&P 500-vísitalan hækkað um 0,76 prósent.