Favre ætlar að mæta til æfinga um helgina

Leikstjórnandinn Brett Favre hefur tjáð framkvæmdastjóra Green Bay Packers að hann ætli að mæta í æfingabúðir liðsins nú um helgina. Hinn 38 ára gamli leikmaður tilkynnti síðasta vor að hann ætlaði að hætta að leika í NFL deildinni.

Favre á fjölda meta í NFL deildinni, þar á meðal flestar snertimarkssendingar (442). Hann er enn samningsbundinn Packers, en þarf að rita deildinni formlegt bréf til að mega snúa aftur til leiks.

Favre hóf feril sinn í NFL með liði Atlanta Falcons árið 1991 og lék þar í eitt ár, en hefur síðan spilað með Packers. Hann varð meistari með liðinu árið 1997 þegar það hafði betur gegn New England Patriots.