Besta viðureign sögunnar

Fólk í tennisheiminum keppist við að ausa lofi á úrslitaviðureignina á Wimbledon-mótinu sem fram fór í gær. Rafael Nadal bar þá sigurorð af Roger Federer í æsispennandi viðureign.

John McEnroe, hinn kunni kappi, segir að þetta hafi verið mest spennandi úrslitaviðureign sem hann hefur séð. Breski tennisleikarinn Tim Henman skrifar pistla fyrir vefsíðu BBC og þar fer hann líka stórum orðum um þessa viðureign.

„Það er enginn vafi í mínum huga að þetta hafi verið besti tennisleikur sem ég hef séð. Rigningin hafði áhrif og spennan var ótrúleg. Það sem gerir þetta enn sérstakara er að þetta var á Wimbledon-mótinu," segir Henman í pistli sínum. „Frammistaða þeirra beggja var frábær og það munaði nánast engu á þeim."