Federer átti náðugan dag

Stigahæstu tennisleikarar heims áttu misauðvelt með að tryggja sig áfram í fjórðu umferðina á opna bandaríska meistaramótinu í tennis sem nú stendur yfir í New York.

Roger Federer, sem er í öðru sæti heimslistans, fór nokkuð létt með Radek Stepanek 6-3, 6-3 og 6-2, en Novak Djokivic sem er í þriðja sæti listans, lenti í bullandi vandræðum gegn hinum 19 ára gamla Main Cilic.

Þó fór svo að lokum að Djokivic hafði betur í fjögurra stunda langri viðureign sinni við hinn unga Cilic og sigraði 6-7 (7-9) 7-5, 6-4 og 7-6 (7-0).

Áður hafði hinn spænski Rafael Nadal farið nokkuð létt með Serbann Viktor Troicki 6-4, 6-3 og 6-0, en hann er í fantaformi þessa dagana og situr í toppsæti heimslistans.