Beðið eftir uppgjörstölum vestanhafs

Gengi helstu hlutabréfavísitalna í Bandaríkjunum hefur hækkað í dag en fjárfestar bíða afkomutalna nokkurra stórfyrirtækja fyrir þriðja ársfjórðung þar í landi. Mesta eftirvæntingin liggur í tölum bandaríska álrisans Alcoa, sem birtir tölur sínar eftir lokun markaða vestanhafs í kvöld auk þess sem bandaríski seðlabankinn birtir álit sitt um stöðu efnahagsmála af síðasta vaxtaákvörðunarfundi sínum í september síðar í dag.

Flestir gera ráð fyrir því að Alcoa hagnist um 7,4 milljarða bandaríkjadali, jafnvirði tæplega 450 milljarða íslenskra króna, á þriðja ársfjórðungi, sem er fimm prósenta aukning á milli ára. Gengi bréfa í félaginu hefur hækkað um rúmlega eitt prósent á markaði í Bandaríkjunum í dag.

Fjárfestar bíða með sérstakri eftirvæntingu eftir punktum af fundi bandaríska seðlabankans en þar er vonast til að hægt verði að sjá næstu skref bankans. Flestir vonast til að seðlabankinn endurtaki ákvörðun sína frá í septemberlok og lækki stýrivexti um allt að 25 punkta til að koma til móts við þrengingar á fjármálamörkuðum upp á síðkastið. Ástandið hefur hins vegar batnað talsvert frá síðasta vaxtaákvörðunarfundi en þá lækkaði bankinn stýrivexti um 50 punkta, langt umfram spár.