Ísland gerði jafntefli við Kanada

Íslenska landsliðið í knattspyrnu gerði í kvöld jafntefli við Kanada, 1-1. Leikurinn var ekki mikið fyrir augað og fá færi litu dagsins ljós. Íslenska liðið var þó sterkara í leiknum en það dugði ekki til. Gunnar Heiðar Þorvaldsson kom Íslendingum yfir með marki af stuttu færi eftir fína sendingu frá Baldri Aðalsteinssyni á 65. mínútu en Oliver Occean jafnaði fyrir Kanada á 74. mínútu með skoti af stuttu færi.

Íslenska liðið átti þó í heild fínan leik. Ragnar Sigurðsson stóð sig mjög vel í sínum fyrsta landsleik, Emil Hallfreðsson átti nokkra mjög góða spretti sem og Baldur Aðalsteinsson. Þá átti Gunnar Heiðar góðan leik í framlínunni. Aðrir leikmenn stóðu sína vakt með prýði.