Ancelotti lofar dularfullum risakaupum í sumar

Mikil spenna ríkir nú í Mílanó eftir ummæli sem Carlo Ancelotti þjálfari AC Milan lét falla á blaðamannafundi í gær. Þar upplýsti hann að félagið væri á góðri leið með að landa stórlaxi á leikmannamarkaðnum í sumar og sagði "heiminn fara á annan endann" ef hann gæfi upp hver leikmaðurinn væri.

"Síðasta sumar voru ekki margir leikmenn sem vildu koma til Milan. Annað er uppi á teningnum núna og ef ég segði ykkur frá einum þeirra sem vill koma til okkar - yrði líklega heimsendir. Við erum mjög stoltir af því að þessi leikmaður vilji koma og spila með AC Milan," sagði Ancelotti leyndardómsfullur.

Menn á borð við Ronaldinho hjá Barcelona hafa verið orðaðir við Mílanóliðið á undanförnum mánuðum, en ef marka má orð Ancelotti er ekki víst að það sé endilega Brasilíumaðurinn sem hér á í hlut. Það verður engu að síður spennandi að fylgjast með framvindu mála á San Siro í sumar.