Keyrt á dreng við KR völlinn

Fólksbifreið ók á átta ára gamlan dreng á Kaplaskjólsvegi við KR áhorfendastúkuna um níu leitið í kvöld. Drengurinn var á reiðhjóli og með hjálm, og mun hafa slasast lítillega að sögn lögreglu á höfuðborgarsvæðinu. Sjúkralið kom á vettvang og hlúði að drengnum en hann er nú til skoðunar á slysadeild.

Leikur KR og Keflavíkur í Landsbankadeild karla í knattspyrnu stóð yfir í Frostaskjóli. Bifreiðum mun hafa verið lagt mjög þétt við völlinn og byrgði það útsýni bæði drengsins og ökumanns bifreiðarinnar.

Að sögn vakthafandi læknis á slysadeild er drengurinn í rannsókn.