Federer jafnaði 30 ára gamalt met

Svissneski tenniskappinn Roger Federer er enn á ný kominn í sögubækurnar en í dag jafnaði hann 30 ára gamalt met Bandaríkjamannsins Jimmy Connors með því að vera í efsta sæti heimslistans 160. vikuna í röð.

Fátt getur komið í veg fyrr að Federer geri metið alfarið að sínu í næstu viku en hann hefur verið á toppnum síðan 2. febrúar árið 2004. Connors var í efsta sæti heimslistans á árunum 1974-1977.

Federer mun líklega halda toppsætinu áfram þó hann hafi ekki keppt síðan hann vann opna ástralska meistaramótið í síðasta mánuði, þar sem hann varð fyrsti maðurinn í 27 ár til að vinna stórmót án þess að tapa einu einasta setti. Hann hefur nú unnið 10 stórmót á aðeins þremur og hálfu ári og eru flestir á því að hinn 25 ára gamli Federer geti brátt talist besti tennisleikari allra tíma. Federer tekur næst þátt í tennismóti í Dubai í næstu viku.