Grönholm leiðir fyrir síðasta keppnisdaginn

Finnski ökumaðurinn Marcus Grönholm hefur 38,4 sekúndna forskot á heimsmeistarann Sebastian Loeb fyrir síðasta keppnisdaginn í Svíþjóðarrallinu á morgun. Grönholm, sem ekur á Ford Focus, var í miklu stuði í dag og vann alls fjórar sérleiðir. Hann á fimmta sigur sinn á ferlinum í Svíþjóð næsta vísan.

Loeb, sem ekur á Citroen, náði sér hins vegar ekki eins vel á strik og náði aðeins að vinna eina sérleið. Í þriðja sæti í rallinu er Mikki Hirvonen, finnskur liðsfélagi Grönholm, en í fjórða sæti er Henning Solberg frá Noregi.