Málflutningur í sex ákæruliðum upprunalegs Baugsmáls á mánudag

Málflutningur í þeim sex ákæruliðum sem eftir standa af upprunalegri ákæru í Baugsmálinu fer fram fyrir Hæstarétti á mánudaginn kemur.

Jón Ásgeir Jóhannesson, forstjóri Baugs, systir hans Kristín Jóhannesdóttir og endurskoðendurnir Stefán Hilmar Hilmarsson og Anna Þórðardóttir eru ákærð í málinu en það er Sigurður Tómas Magnússon, settur ríkissaksóknari sem fer með málið fyrir hönd ákæruvaldsins.

Í upphaflegu ákærunni voru 40 ákæruliðir en Hæstiréttur vísaði 32 þeirra frá. Þá voru átta eftir og í Héraðsdómi í mars í fyrra voru sakborningar sýknaðir af þeim. Settur ríkissakssóknari ákvað að áfrýja sex þeirra til Hæstaréttar og það eru þeir sem teknir verða fyrir á mánudaginn kemur. Líklegt má telja dómur málinu verði svo kveðinn upp rúmri viku eða tveimur vikum síðar.