Moss Bross sendir frá sér afkomuviðvörun

Verslanakeðjan Moss Bros, sem selur föt fyrir karlmenn, hefur sent frá sér afkomuviðvörun þar sem fram kemur að líkur séu á nokkuð minni hagnaði á síðasta ári en vænst var vegna erfiðra aðstæðna.

Á meðal ástæðanna fyrir samdrættinum er gott veðurfar í Bretlandi og heimsmeistarakeppnin í knattspyrnu í Þýskalandi síðasta sumar sem hafði áhrif á afkomu verslana í Bretlandi.

Breska ríkisútvarpið (BBC) segir fyrirtækið engu að síður líta björtum augum til framtíðar.

BBC segir ennfremur að orðrómur hafi verið uppi um að Baugur hafi hug á að auka við hlut sinn í verslanakeðjunni og vitnar til þess að fyrirtækið eigi fjölda verslanakeðja í Bretlandi, svo sem House of Fraser, Hamleys og Karen Millen. Baugur er einn af stærstu hluthöfum Moss Bros í gegnum fjárfestingafélagið Unity, sem FL Group og Kevin Stanford standa að, með tæpan 30 prósenta hlut.

Breska blaðið Guardian hefur eftir greinendum að búist sé við 2 prósenta samdrætti í sölu hjá Moss Bros á seinni helmingi síðasta árs en gera megi ráð fyrir allt að 10 prósenta samdrætti í sölu á einstökum vöruflokkum á borð við frakka.