Breytir Amman í Bagdad

„Ég er nú bara uppá hótelherbergi hérna í Petra, sem er svona eiginlega Kópavogur Amman, rétt fyrir utan," segir Karl Júlíusson sem hefur nú í fimm mánuði unnið að gerð leikmyndar fyrir kvikmyndina The Hurt Locker í Jórdaníu.

Leikstjóri myndarinnar er Katherine Bigelow en með aðalhlutverkið fer Jeremy Renner. Karl og Renner ættu því að vera farnir að þekkjast ágætlega því bandaríski leikarinn lék einnig í kvikmynd Baltasars Kormáks, A Little Trip to Heaven, sem Karl gerði leikmyndina við. „Við erum einmitt í smá pásu núna því hann snéri sig eitthvað illilega en við reiknum með að byrja aftur von bráðar," segir Karl en áætlað er að tökum ljúki 26.september.

Meðal annara leikara í myndinni má nefna stórleikarann Ralph Fiennes og áströlsku stjörnuna Guy Pierce en gert er ráð fyrir að hún verði frumsýnd síðsumars á næsta ári eða næsta haust. „Tökuliðið heldur síðan til Bandaríkjanna að þeim loknum og þar fara fram einhverjar tökur en ég kem bara heim."

Kvikmyndin The Hurt Locker segir frá sprengjusveit sem er gert að aftengja sprengjur frá Al-Kaída í Íraksstríðinu. Myndin gerist að öllu leyti í Bagdad en eðilega var ekki hægt að fara með kvikmyndatökulið þangað sökum ástandsins þar. Hlutverk Karls var því að breyta Amman í Bagdad. „Ég hef verið að byggja rústir og einnig verið í nánu samstarfi við bandarískt sprengjulið sem sérhæfir sig í þessum verkefnum," segir Karl.

Miðausturlönd hafa verið töluvert mikið í fréttum og oftar en ekki eru þær tengdar við heittrúaða múslima sem brenna bandaríska fána á götum úti. Karl segist vissulega hafa komið til Jórdaníu með fyrirfram ákveðnar skoðanir en fljótlega gert sér grein fyrir því að þær væru matreiddar að hætti CNN og annarra alþjóðlegra stöðva.

„Nú horfi ég bara Al-Jazeera, bestu sjónvarpsstöð í heimi," segir Karl og hlær en þar liggur augljóslega eitthvað meira að baki. „Að fá að vera hérna í allan þennan tíma hefur í einu orði sagt verið ótrúlega uppfræðandi og menntandi. Ég kann ótrúlega vel mig hérna og að fá kynnast þessum heimshluta með eigin augum eru eiginlega forréttindi. Þetta er eitthvað það gestrisnasta og yndislegasta fólk sem ég hef kynnst," segir Karl og heldur áfram.

„Okkur hefur verið tekið með kostum og kynjum, verið boðið í mat og kaffi og þetta er bara eins og sitja í teboði uppí Mávahlíð, einfaldlega fólk með sömu vandamál og við," útskýrir Karl. „Þessi dvöl hefur breytt mínu viðhorfi og að fá að kynnast fólkinu hérna undir þessum formerkjum er algjörlega einstakt."