Lagasmiður í ham

There Is Only One er tólfta plata Sverris Stormsker á rúmlega tuttugu ára ferli. Hún var tekin upp í Taílandi og hefur að geyma tólf lög og texta á ensku eftir Sverri sjálfan, en auk hans syngja á plötunni þau Myra Quirante og Gregory Carroll.

Sverrir hannar umslagið og sér sjálfur um upptökustjórn og útsetningar og spilar öll hljóðfæri nema strengi, en um strengjaleik sér Thai Pumbui String Orchestra. Eins og fram hefur komið í fjölmiðlum eru textarnir samdir í ástarsorg og fjalla um heitrof og söknuð.

Það hefur lengi verið vitað að Sverrir Stormsker er snillingur. Hann er öflugur lagasmiður og skemmtilegur textahöfundur. Sverrir er konungur power-ballöðunnar og There Is Only One byrjar einmitt á einni slíkri, You 've Got Hope If You've Got A Friend. Á plötunni skiptast svo á kraftmiklar ballöður sem Myra og Gregory fá að þenja sig í og rólegri og lágstemmdari lög sem Sverrir syngur flest sjálfur.

Það er greinilegt að Sverrir hefur verið í miklum ham þegar hann samdi lögin á þessari plötu. Hvert snilldarlagið rekur annað. Persónulega er ég hrifnastur af Gray Love (minnir á Bítlana), Eternal Love og hinu tæplega tíu mínútna langa lokalagi Fake It Till You Break It. Þrjár perlur sem eiga skilið að fá mikla spilun.

Það eru fleiri fín lög á plötunni og söngvararnir standa sig ágætlega. Það sem hins vegar skemmir fyrir henni að mínu mati eru útsetningarnar. Þær eru mjög klisju-kenndar og draga plötuna niður. Það er allt of mikill Eurovision/Idol stíll á þessu. Sverrir er lagasmiður á heimsmælikvarða og það væri virkilega spennandi að heyra lögin hans unnin af einhverjum af stóru pródúserunum í poppheiminum. Ég er sannfærður um að ef hann væri með góðan umba þá gæti hann lifað góðu lífi af því að selja frægum tónlistarmönnum lög. Robbie Williams hefði t.d. vel getað notað nokkur af þessum lögum á sinni síðustu plötu. Hún hefði batnað mikið við það. Setja Einar Bárðar í málið …

Á heildina litið er þetta ágæt plata. Full af flottum lagasmíðum, en með ferskari og öflugri útsetningum hefði hún orðið enn betri.