Kvikmyndaveisla í stofunni

Græna ljósið og SkjáBíó efna til mikillar veislu heima í stofu fyrir áskrifendur Skjásins. Kvikmyndaveislan hefst í dag með sýningu írönsku kvikmyndarinnar Offside en hún hlaut Silfurbjörninn í Berlín í fyrra.

Í framhaldi verða síðan níu myndir sýndar í heilan mánuð sem allar eiga það sameiginlegt að koma ekki á myndbandaleigur landans og vera frá níu mismunandi löndum en meðal þeirra eru myndir frá Hollandi, Bandaríkjunum og Japan. Er því hér um einstakt tækifæri að ræða fyrir kvikmyndaunnendur.

Meðal þeirra leikstjóra sem eiga kvikmyndir á þessari „stofu-hátíð“ má nefna hinn umdeilda Lukas Moodysson sem síðast gerði Hole in my Heart en hún fékk gríðarlega sterk viðbrögð. Og Moodysson heldur áfram að skoða skúmaskot mannshugans í myndinni Container.

Að sögn Ísleifs B. Þórhallssonar hjá Græna ljósinu er ekki loku skotið fyrir það að svona verði endurtekið í framtíðinni og að jafnvel verði um árvissan atburð að ræða.