Lánshæfi ítalska ríkisins lækkar

Alþjóðlegu matsfyrirtækin Standard & Poor´s og Fitch Ratings lækkuðu í gær lánshæfismat Ítalska ríkisins. Ástæður lækkunarinnar eru há skuldastaða hins opinbera og mikill viðskiptahalli á Ítalíu.

Greiningardeild Glitnis segir í Morgunkorni sínu í dag að Romano Prodi, hinn nýi forsætisráðherra landsins, hafi lagt fram áætlanir um að lækka skuldir og minnka viðskiptahallann.

Að sögn greiningardeildarinnar telja matsfyrirtækin að áætlanir Prodis gangi ekki nógu langt enda sé Ítalía þriðja skuldugasta ríki í heimi, á eftir Japan og Bandaríkjunum.

Þá kemur ákvörðunin illa við ítalska ríkið, ekki síst vegna þess að á sama tíma eru vextir að hækka á evrusvæðinu. Því verði erfiðara en ella fyrir hið opinbera að draga úr skuldum og minnka viðskiptahallann, bæði vegna lægra lánshæfismats og hækkandi vaxta.