Indverska hlutabréfavísitalan Sensex hefur hækkað um 57 prósent á árinu þrátt fyrir snarpa dýfu um mitt ár. Vísitalan nálgast nú 13.000 stiga markið og hefur aldrei verið hærri.
Vísitalan hækkaði um 1,5 prósent í dag og endaði lokagengi hennar í 12.927 stigum. Ástæðan fyrir hækkuninni er bjartsýni fjárfesta um góða afkomu fyrirtækja á Indlandi á öðrum fjórðungi ársins.
Mest voru viðskipti með bréf í tæknifyrirtækjunum Infosys og Tata Consultancy.
Hlutabréfavísitalan féll snögglega í indversku kauphöllinni í júní og fór niður fyrir 9.000 stiga markið.
