Soros berst gegn fátækt

Bandaríski auðkýfingurinn George Soros hefur ákveðið að veita Sameinuðu þjóðunum 50 milljónir bandaríkjadala, jafnvirði rúmra 3,5 milljarða íslenskra króna, á næstu fimm árum til að berjast gegn fátækt og útbreiðslu alnæmis í Afríku.

Verkefni Sameinuðu þjóðanna nefnist Millennium Villages Project og á það að stuðla að því að byggja upp heilbrigðisstofnanir í Afríku, auka menntun barna og hjálpa bændum út úr viðjum fátæktar í 79 þorpum í 10 Afríkuríkjum. Á meðal ríkjanna eru Eþíópía, Gana, Malí, Rúanda og Úganda.

Gert er ráð fyrir því að verkefnið, sem stendur fram til ársins 2015, komi til með að kosta 100 milljónir dala eða rúma 7 milljarða íslenskra króna.

Soros sagði í samtali við fréttastofu Reuters að verkefni SÞ geti haft mikla þýðingu fyrir fátæka bændur í dreifðari byggðum Afríku.

Að sögn breska ríkisútvarpsins, BBC, fá íbúar þorpa í Afríku flugnanet til að koma í veg fyrir að þeir smitis af malaríu og tilbúinn áburð auk þess sem læknisaðstoð verður veitt þeim sem smitasta hafa af alnæmi.