Vieira er velkominn hingað

Serbneski varnarmaðurinn Sinisa Mihajlovic hjá Inter Milan á Ítalíu, segist muni bjóða Patrick Vieira velkominn ef hann kjósi að ganga í raðir Inter eins og orðrómur hefur verið á kreiki um að undanförnu. Mihajlovic var dæmdur í sex leikja bann árið 2000 fyrir að ausa Vieira kynþáttaníð í leik í meistaradeildinni.

"Ég verð manna ánægðastur ef Vieira ákveður að ganga í raðir Inter og held að allir yrðu mjög ánægðir. Ég hef ekkert á móti honum þó við höfum tekið smá rimmu þarna forðum. Svona lagað gerist á knattspyrnuvellinum, en það er nú orðið langt síðan," sagði Serbinn, sem þá lék með Lazio sem mætti Patrick Vieira og félögum í Arsenal.