Olíutunnan yfir 70 dollurum

Verð á hráolíu hækkaði lítillega á helstu mörkuðum í dag í kjölfar vaxandi spennu vegna kjarnorkuáætlunar Írana, sem er annað stærsta landið innan OPEC, samtaka olíuframleiðsluríkja, og það fjórða stærsta á heimsvísu. Stjórnvöld í Íran hafa hótað að draga úr olíuframleiðslu sinni vegna yfirvofandi refsiaðgerða en það hefur töluverð áhrif á olíuframboð.

Olía, sem afhent verður í næsta mánuði, hækkaði um 21 sent á mörkuðum í New York í Bandaríkjunum í dag og fór í 70,40 Bandaríkjadollara á tunnu. Norðursjávarolía hækkaði um 10 sent á tunnu á mörkuðum í Lundúnum í Bretlandi og stendur nú í 70,19 dollurum á tunnu.