Bæjarstarfsmannafélög lýsa yfir vonbrigðum með Launamálaráðstefnu

Samflot bæjarstarfsmannafélaga hefur sent frá sér fréttatilkynningu þar sem lýst er yfir miklum vonbrigðum með að ekki hafi verið gefin skýr skilaboð eftir launamálaráðstefnu sveitarfélaga um hvernig leysa eigi þann hnút sem launamál sveitarfélaganna eru í.

Í tilkynningunni segir að gert hafi verið ráð fyrir að ákveðin niðurstaða myndi fást á ráðstefnunni þar sem sveitarstjórnarmenn höfðu vísað erindum og beiðnum um leiðréttingar á kjörum starfsmannafélaga þangað til úrlausnar.

Forsvarsmenn Samflots bæjarstarfsmannafélaga segja miklar væntingar hafa verið bundnar við ráðstefnuna en að nú sé málið enn í biðstöðu þar sem niðurstaða hennar var að Launanefnd sveitarfélaga verði falið að fjalla um tillögur og hugmyndir sem komu fram á ráðstefnunni. Þær niðurstöður verði ekki kynntar sveitarstjórnum fyrr en 10. febrúar og ljóst sé að þolinmæði starfsmanna sveitarfélaga endist ekki svo lengi. Fjöldi starfsmanna innan bæjarstarfsmannafélaga séu í nákvæmlega sömu stöðu og félagsmenn í Leikskólakennarafélagi Íslands og þess vegna sé óviðunandi ef ætlunin sé að skoða eingöngu sértæka hópa.