Íslensk tónlist fær góðan stuðning

Samningur um rekstur útflutningsskrifstofu fyrir tónlist var undirritaður á dögunum. Felur hann í sér loforð um aukin fjárframlög til íslenskrar tónlistar.

„Þetta var stór dagur fyrir tónlistina á Íslandi því þarna sýndu menn hug sinn til þessarar greinar sem hefur stundum þótt dálítið afskipt. Afrakstur áratuga lobbíisma er að líta dagsins ljós,“ segir Jakob Frímann Magnússon, sem er á meðal þeirra sem hafa beitt sér í málinu.

„Þetta mun gefa henni skilyrði sambærileg við aðrar greinar. Það má segja þessum ágætu ráðherrum til hróss að þeir gerðu þetta glæsilega með hjálp Björgólfs Guðmundssonar [bankastjóra Landsbankans] og Samtóns [samtök réttahafa tónlistar]. Nú er búið að mynda langþráð stoðkerfi sem verður að einhverju leyti til fulltingis því sjálfssprottna stoðkerfi sem Reykjavíkurborg, Samtónn og Flugleiðir bjuggu til með Loftbrú,“ segir hann.