Um 50 útköll

Lögreglan á Akranesi var kölluð út um fimmtíu sinnum frá því klukkan þrjú aðfaranótt sunnudags og fram undir hádegi á sunnudeginum. Öll útköllin voru innanbæjar á Akranesi.

Flestöll útköllin voru vegna þess að fólki gekk erfiðlega að komast heim til sín eftir vinnu um nóttina, eða að komast til vinnu sinnar um morguninn, vegna snjóþyngsla. Lögreglan aðstoðaði fólkið við að koma bílum sínum af stað.

Pétur Jóhannesson, lögregluvarðstjóri hjá lögreglunni á Akranesi, segir að ekki hafi snjóað eins mikið í bænum í mörg ár.