Fyllti á án þess að greiða

Tvítug kona var á þriðjudag dæmd í Héraðsdómi Reykjavíkur fyrir gripdeild vegna síendurtekins bensínstuldar í júlí á þessu ári. Konan gerði sér sex sinnum ferð á tvær mismunandi bensínstöðvar Olís á áðurnefndu tímabili og dældi eldsneyti á bifreið sína án þess að greiða fyrir það.

Konan mætti ekki fyrir dóm til að svara fyrir sakir sínar. Henni var gert að greiða 60.000 króna sekt til ríkissjóðs auk þess sem hún þarf að greiða Olís 24.054 krónur fyrir eldsneytið sem hún stal að viðbættum vöxtum.