Acer komið upp fyrir Dell í borðtölvum

Á þriðja ársfjórðungi þessa árs komust Acer borðtölvur í fyrsta sinn upp fyrir tölvur Dell í sölutölum í Evrópu, Afríku og Miðausturlöndum samkvæmt markaðsgreiningarfyrirtækinu Gartner.

Hingað til hefur Acer ekki náð að skáka eldri risum tölvugeirans nema í fartölvusölu þar sem fyrirtækið heldur enn forskoti sínu.

Í tölum Gartner kemur einnig fram að borðtölvusala hafi aukist um 6,7 prósent á þriðja ársfjórðungi miðað við sama tíma í fyrra.

Gögn um vöxt upplýsingatæknigeirans í heild benda til meðalvaxtar upp á 12,3 prósent á ársgrundvelli. Acer þykir hins vegar hafa slegið met í vexti því þar mælist aukningin þrefalt meiri, eða 37,1 prósent.

Daníel Rúnarsson, markaðsstjóri Svar tækni, umboðsaðila Acer hér á landi, segir Evrópumarkaðinn hafa gengið mjög vel hjá fyrirtækinu. „HP hefur alltaf verið númer eitt, Dell númer tvö og svo Acer í þriðja sæti, þannig að okkur þykja þetta nú töluverð tímamót," segir hann, en er þó ekki viss um að mæling Gartner endurspegli stöðuna sem hér er á markaði, en engar tölur eru hér til um markaðshlutdeild einstakra vörumerkja. „Þetta hins vegar staðfestir tilfinningu okkar um gengi Acer hér heima. Fartölvusala hefur gengið mjög vel og borðtölvusala aukist jafnt og þétt."