Leikið á langspil og saltara

Rangt var farið með tímasetningu tónleika í Dómkirkjunni í Fréttablaðinu í gær. Tónleikar á kirkjuloftinu voru sagðir fara fram í dag en hið rétta er að þeir verða ekki fyrr en á morgun, sunnudag. Eru lesendur blaðsins beðnir velvirðingar á mistökunum.

Tónleikarnir bera yfirskriftina „Okkur til gleði og Guði til dýrðar“ en á efnisskránni er tónlist frá 16. og 17. öld úr handritum og útgáfum frá Hólum í Hjaltadal og einnig þjóðlög úr safni séra Bjarna Þorsteinssonar. Bæði er um að ræða sálma og guðsorð en einnig veraldlegan kveðskap og danslög.

Þar eru Hólabækurnar 1589 og 1619 veigamestar, en einnig eru lög tekin úr Grallaranum. Nokkur lög fyrirfinnast eingöngu í Melódía-handritinu frá um 1650 en önnur eru til í nokkrum útgáfum Má segja með nokkurri vissu að mörg þessara laga séu aftur úr kaþólskum sið.

Undir sönginn verður leikið á forn hljóðfæri sem notuð voru hér á landi á miðöldum og síðar. Þar er veigamest langspilið en einnig verður leikið á symfón, saltara og trommu.

Flytjendur eru þau Marta Guðrún Halldórsdóttir, Sigursveinn Magnússon og Örn Magnússon. Að sögn flytjenda telja þeir sig vera komnir niður á það krydd sem hæfi þessum lögum hvað best, en það er bundið í hljómi áðurnefndra hljóðfæra.

Tónleikarnir hefjast kl. 17 á morgun.