Tvenna hjá Timberlake

Justin Timberlake var valinn besti popparinn og besti karlkyns tónlistarmaðurinn á evrópsku MTV-tónlistarverðlaunahátíðinni sem var haldin með pomp og prakt í Kaupmannahöfn í fyrrakvöld.

Hljómsveitin Red Hot Chili Peppers frá Los Angeles fékk verðlaun fyrir bestu plötuna, hina tvöföldu Stadium Arcadium, og Christina Aguilera var valin besti kvenkyns tónlistarmaðurinn.

Crazy besta lagið

Hátíðin var send beint út til sautján landa og heppnaðist með eindæmum vel. Mikil stemning ríkti í The Bella Center þar sem verðlaunin voru afhent. Spiluðu þar m.a. hljómsveitirnar Muse og Lordi frá Finnlandi sem lauk kvöldinu. Auk þess safnaðist mikill mannfjöldi saman á Ráðhústorginu þar sem Snoop Dogg, Keane, Jets og The Killers tróðu upp í kuldanum.

Lag Gnarls Barkley, Crazy, var valið best auk þess sem Muse var valin besta jaðarhljómsveitin. Besta hljómsveitin var aftur á móti kjörin hin fornfræga Depeche Mode. Kanye West dónalegur

Justin Timberlake var kynnir á hátíðinni og stóð sig með prýði. Athygli vakti þegar hljómsveitin Justice vs. Simian tók á móti verðlaunum fyrir besta myndbandið, við lagið We Are Your Friends. Ruddist þá rapparinn Kanye West, sem hafði áður verið kjörinn besti hiphop-tónlistarmaðurinn, inn á sviðið og sagði það hneisu að hann skyldi ekki hafa fengið verðlaun fyrir myndbandið Touch The Sky. „Ef ég fæ ekki þessi verðlaun þá er dómnefndin illa trúverðug,“ sagði hann. - fb