Lísa í Sundralandi á leiksvið

Nýlega var fyrsti samlestur á desemberverki Leikfélags Reykjavíkur í Borgarleikhúsinu. Það er eftir Bretann Anthony Neilson og kallast í þýðingu Þórarins Eldjárns Ó, fagra veröld en á frummálinu Wonderful world of dissosia. Þetta er nútíma ævintýri um Lísu í „Sundralandi“ eins og Þórarinn snýr út úr.

Við fylgjum Lísu inn í undraheim geðveikinnar, litríkan heim ótrúlegra andstæðna þar sem Lísa mætir alls kyns dularfullum verum og lendir í krefjandi ævintýrum. Við fáum líka að skyggnast yfir landamærin þar sem við mætum náköldum raunveruleikanum, þar eru litirnir horfnir og Lísa þarf að takast á við hið raunverulega líf. Hvort er betra draumur eða veruleiki? Það er Benedikt Erlingsson sem leikstýrir en sviðsetning hans á Draumleik Strindbergs á stóra sviðinu vakti mikla athygli og lof fyrir fáum misserum og var verðlaunuð af Grímugenginu. Með honum er Gretar Reynisson sem var verðlaunaður fyrir sömu sýningu.

Leikhópurinn er ekki stór: Ilmur Kristjánsdóttir, Laddi, Guðmundur Ólafsson, Margrét Helga Jóhannsdóttir, Þór Tulinius, Björn Ingi Hilmarsson, Bergur Þór Ingólfsson og Charlotte Böving. Ilmur snýr nú aftur til starfa eftir mæðraorlof og Charlotte Böving kemur nú á stóra sviðið undir stjórn bónda síns en hún er virt leikkona í heimalandi sínu, Danmörku.