Kemur ekki til greina að fara

 George Bush, forseti Bandaríkjanna, sagði í vikulegu útvarpsávarpi sínu í gær að ekki kæmi til greina að kalla bandaríska herliðið heim frá Írak. Með því að hörfa á brott væri hryðjuverkamönnum veitt öruggt athvarf þar sem þeir gætu skipulagt árásir á Bandaríkin. Einnig væri minning þeirra sem látist hafa í stríðinu vanvirt ef herliðið væri kallað til baka, með því væri fórn þeirra höfð að engu.

Hann sagði síðustu vikur hafa verið sérstaklega erfiðar herliði Bandaríkjamanna í Írak sem og lögregluliði heimamanna, en mikilvægt sé að missa ekki sjónar á lokatakmarkinu sem væri sigur. Forsetinn fundaði með helstu sérfræðingum sínum í hernaðarmálum í gær varðandi stöðuna í Írak.

Ofbeldi hélt áfram í Írak í gær. Að minnsta kosti átján létust í sprengjuárás á markað sunnan við Bagdad. Herskáir sjíar gerðu einnig árás á lögreglustöð í nágrenni Bagdad þar sem átta létust. Þrír bandarískir hermenn létu lífið í árás uppreisnarmanna í al-Anbar héraði.

Októbermánuður hefur verið einn sá blóðugasti í Írak síðan innrás Bandaríkjamanna hófst fyrir rúmum þremur árum.