Vorum ömurlegir í þessum leik

Valsmenn sóttu Fylkismenn heim í Árbænum í gær. Fylkismenn náðu fjögurra marka forskoti í upphafi leiks og héldu því til leiksloka og unnu sanngjarnan sigur, 28-26. Þjálfari Vals, sem var spáð sigri í úrvalsdeild karla fyrir mótið, var mjög ósáttur en lítill meistarabragur var yfir Valsmönnum í gær.

Þetta var ömurlegur leikur. Ég tek það ekki af Fylkismönnum að þeir börðust eins og ljón, spiluðu eins og lið á meðan við lékum eins og einstaklingar. Þeir voru bara betri og áttu sigurinn skilið.

Fylkismenn, sem spáð hafði verið falli, hófu fyrsta heimaleik sinn af krafti og skoruðu fyrstu fjögur mörk leiksins og héldu því forskoti svo allt til leiksloka.

Eftir góða byrjun heimamanna hrukku Valsmenn hægt og rólega í gang og leikurinn jafnaðist aðeins út, en Fylkismenn héldu forskoti sínu. Lítið gekk hjá liðunum í sókninni í fyrri hálfleik en þó voru heimamenn skárri, á meðan Markús Máni Mikaelsson hélt sóknarleik Valsmanna uppi einn síns liðs á köflum. Staðan í hálfleik var 14-9 og gáfu þær tölur rétta mynd af leiknum.

Valsmenn komu ákveðnari til leiks í síðari hálfleik en heimamenn stóðu fastir fyrir og innbyrtu á endanum sigur sem var síst of stór. Góð markvarsla Hlyns Morthens, sem varði fimmtán skot í leiknum, og stórleikur Eymars Krüger, sem var markahæstur í liði heimamanna með fjórtán mörk, varð til þess að sigur Fylkismanna var aldrei í hættu.

Þjálfari Fylkismanna, Sigurður Sveinsson, var ánægður með sigurinn. Það má segja að við höfum í dag náð að spila heilan leik eins og við lékum fyrri hálfleikinn á móti HK. Við lentum í vandræðum með brottvísanir og klaufamistök og því var sigurinn í raun ekki jafn tæpur og lokatölurnar gefa til kynna en ég er stoltur af strákunum að hafa klárað þetta.

Í liði Valsmanna var Markús Máni markahæstur með tólf mörk en að honum undanskildum voru Valsmenn heillum horfnir í gær og ljóst að þeirra bíður ærið starf ef þeir ætla að standa undir væntingum í vetur.