Lýsa furðu á takmörkunum

Símhleranir Stjórn Sagnfræðingafélags Íslands sendi frá sér ályktun í gær þar sem félagið lýsir furðu sinni á takmörkunum á aðgangi að gögnum um símahleranir í vörslu Þjóðskjalasafnsins.

Í ályktuninni segir að sjálfsagt sé að ákveðnar reglur gildi um aðgang að skjölum af þessu tagi en afar varhugavert að þær hömlur vegi þyngra en réttur til rannsókna á liðinni tíð, að teknu tilliti til sjálfsagðra ákvæða um persónuvernd. Einnig eiga einstaklingar, sem hafa rökstuddan grun um að um þá sé fjallað í þeim gögnum sem um ræðir, rétt á því að kanna þau með sömu skilyrðum og aðrir hafa notið. Allir eiga að vera jafnir fyrir lögum og reglum um aðgang að opinberum gögnum. Guðni Th. Jóhannesson, formaður félagsins, vék af fundi þegar ályktað var um málið þar sem hann tengist málinu, bæði með því að hafa verið veittur aðgangur að sumum gögnum en synjað um aðgang að öðrum.

Mikil umræða hefur verið á meðal sagnfræðinga undanfarna daga um málið og ekki síst á póstlistanum Gammabrekku. Þar hefur stjórn Sagnfræðingafélagsins verið hvött til að álykta um málið. Sérstaklega eru sagnfræðingar ósáttir við framgöngu Ólafs Ásgeirssonar, þjóðskjalavarðar, og fullyrða að hann hafi brotið siðareglur Sagnfræðingafélagsins með því að neita fjölmörgum einstaklingum um aðgang að gögnunum, með þeim rökum að eðlilegt sé að nefnd um upplýsingamál fjalli um kærumál sem tengjast málinu áður en frekari aðgangur er veittur.