Ég marka stóran þátt í sögu Newcastle

Vandræðagemlingurinn Lauren Robert, sem er í láni hjá Portsmouth frá Newcastle, segir að þó hann eigi ekki von á því að snúa aftur til félagsins, hafi hann markað djúp spor í sögu félagsins og eigi sér dygga stuðningsmenn þar.

Robert hefur meðal annars verið orðaður við lið Marseille í heimalandi sínu. "Ég er ekki viss um hvað framtíðin ber í skauti sér, en ég vil svo sannarlega ekki vera hjá Portsmouth ef ég á bara að sitja á varamannabekknum," sagði Robert, en þó virðist lítil hætta á því eftir að Harry Redknapp hrósaði honum í hástert fyrir frammistöðu sína um helgina.

Þó Robert eigi ekki von á því að fara til Newcastle aftur, segist honum þykja vænt um félagið. "Newcastle hefur reynst mér vel, en ég hef líka reynst Newcastle vel og ég veit að ég hef markað spor í sögu félagsins og skipa enn stóran sess í hjörtum stuðningsmanna liðsins," sagði Robert í samtali við France Football.