Vill opinbera rannsókn á Baugsmáli

Margrét Frímannsdóttir, þingmaður Samfylkingarinnar, vill opinbera rannsókn á Baugsmálinu. Hún segir frávísun Héraðsdóms á ákærunni í málinu og fréttir síðustu daga um bréfaskipti áhrifamanna hafa skapað efasemdir meðal almennings um heilindi valda- og áhrifamanna sem verði vart eytt nema með rannsókn. Margrét vill láta rannsaka aðdraganda þess, rannsókn og ákæru Ríkislögreglustjóra sem Héraðsdómur Reykjavíkur vísaði frá dómi og hvernig tölvupóstur fólks kemst í fjölmiðla í gegnum annað fólk. Hún segir annaðhvort hægt að skipa rannsóknarnefnd eða fá einhvern einstakling til að bera ábyrgð á rannsókninni. Hún segir að þar gæti til dæmis verið um fyrrverandi dómara að ræða.