Ágallarnir of miklir

Ágallarnir á þeim átján ákæruliðum  í Baugsmálinu, sem dómarar í málinu höfðu tiltekið með bréfi í lok ágúst, þykja vera svo miklir að vísa þurfi málinu frá dómi. Í niðurstöðu úrskurðarins segir að þar sem ágallar eru á verulegum hluta ákærunnar sé ekki hjá því komist að vísa málinu frá í heild. Samkvæmt lögum um meðferð opinberra mála ber að greina sakagiftir í ákæru þannig að þær séu svo skýrar og ótvíræðar að ekki þurfi að deila um hverjar þær séu. Þar vegur verknaðarlýsingin sjálf þyngst. Helgast þetta meðal annars af því að sakborningi er nauðsyn að vita hvaða athæfi honum er gefið að sök svo að hann geti varið sig. Ennfremur þarf dómari að geta gert sér glögga grein fyrir efni máls svo hann geti lagt á það dóm. Þótti dómnum ákærunni verulega áfátt að þessu leyti. Jón. H. Snorrason, saksóknari Ríkislögreglustjóra, segir niðurstöðuna ekki vera áfall. Jafnframt segir hann of snemmt að segja til um hvort hafist verði handa við að undirbúa nýja ákæru. Jón sagði þó við fréttamenn eftir að niðurstaða úrskurðarins var kunn að embættið myndi kæra niðurstöðuna til Hæstaréttar. Gestur Jónsson, verjandi Jóns Ásgeirs Jóhannessonar, var að vonum ánægður eins og aðrir verjendur í málinu. „Það var ljóst að mat dómaranna var það að það væru verulegir annmarkar á ákærunni eftir bréfið sem þeir skrifuðu 26. ágúst og þessi niðurstaða, um að vísa málinu frá í heild sinni, er í samræmi við þeirra álit. Það kemur fram í forsendum úrskurðarins að þeir telja að þetta sé svo stór hluti málsins, sem sé haldinn þessum annmörkum að þeir telja sér skylt að vísa málinu frá í heild sinni,“ sagði Gestur.