5 mánaða fangelsi fyrir líkamsárás

Karlmaður á þrítugsaldri var í dag dæmdur í Héraðsdómi Norðurlands eystra í fimm mánaða fangelsi, þar af þrjá mánuði skilorðsbundið, fyrir líkamsárás. Maðurinn var einnig ákærður fyrir aðild að annarri líkamsárás en var sýknaður af þeirri ákæru. Í dóminum kemur fram að maðurinn hafi barið annan mann með flösku í höfuðið á Húsavík á síðasta ári þannig að sá sem fyrir árásinni varð skarst á augabrún, vör og víðar í andlitinu. Maðurinn sem var dæmdur hefur verið sakfelldur fyrir ýmis brot frá árinu 1999 þegar hann var 16 ára gamall. Árið 2003 var maðurinn dæmdur í fjögurra mánaða skilorðsbundið fangelsi fyrir líkamsárás og rauf hann skilorð þess dóms. Maðurinn var einnig dæmdur til að greiða þeim sem fyrir árásinni varð 158 þúsund krónur í bætur.