Kennir fólki að bjarga mannslífum

Rauði Kross Íslands hefur lengi séð um að skipuleggja skyndihjálparnámskeið bæði fyrir einstaklinga, fyrirtæki og hópa en þau geta verið sniðin að þörfum hvers og eins. "Við erum að vonast til þess að það sé einhver vakning núna þar sem aukin eftirspurn hefur verið eftir skyndahjálparnámskeiðum í fyrirtækjum og stofnunum," segir Björgvin Herjólfsson, skyndihjálparþjálfari hjá fyrirtækinu Icesec sem sér um hópnámskeið í umboði Rauða krossins. "Á fjórum klukkustundum förum við yfir grunninn sem felur í sér endurlífgun þar sem notast er við brúðu," segir Björgvin. Til að læra öll atriði skyndihjálpar þarf hins vegar að taka fullt námskeið, 16 stunda langt, og er þar farið yfir hluti eins og aðkomu að slysi, fyrstu endurlífgun, beinbrot og stöðvun blæðinga svo eitthvað sé nefnt. "Ég tel alveg nauðsynlegt að fólk læri skyndihjálp svo það viti hvernig það eigi að bregðast við og það er betra að taka fjögurra stunda námskeið en að taka ekki neitt." Spurður hvort hann viti til þess að einhver af nemendum hans hafi þurft að nýta sér skyndihjálpina eftir námskeið, minnist hann konu sem kom að slæmu slysi. "Ég fékk þakkir frá konu sem hafði komið að bílslysi út á landi. Hún hafði víst verið eins og hershöfðingi þar til sjúkrabíllinn kom á vettvang," segir Björgvin. Skyndihjálp er ekki skyldunám hjá neinni stétt utan heilbrigðisgeirans ef frá eru taldir bílstjórar með meirapróf. "Sum fyrirtæki eru hins vegar mjög vakandi fyrir nauðsyn þess að senda starfsfólk sitt á þessi námskeið og í mörgum tilfellum taka starfsmannafélögin sig til og standa fyrir námskeiðum," segir Björgvin. "Það er alltaf ánægjulegt að sjá dæmi þess að þetta er tvímælalaust að bjarga mannslífum, og maður brosir út í annað því það er gaman að sjá vinnu sína skila árangri," segir Björgvin.