Brasilísk kona í 2 ára fangelsi

Héraðsdómur Reykjaness dæmdi í dag 26 ára brasilíska konu í tveggja ára fangelsi fyrir að smygla til landsins 860 grömmum af kókaíni og tæplega 11 grömmum af LSD í desember í fyrra. Konan faldi fíkniefnin innanklæða og í leggöngum en efnin fundust við líkamsleit á Keflavíkurflugvelli. Hún var handtekin og hefur setið í gæsluvarðhaldi síðan. Konan sagði fyrir dómi að henni hefði verið boðnir átta þúsund bandaríkjadalir fyrir að flytja fíkniefnin til Íslands og hún hefði fallist á að gera það vegna bágrar fjárhagsstöðu sinnar.