Bráðum geta allir knúsað kisu

Gæludýr eru næstalgengasti ofnæmisvaldurinn á Bretlandi og helmingur astmaveikra barna hefur ofnæmi fyrir köttum. Breskir vísindamenn hafa fundið aðferð til að minnka þessi ofnæmisviðbrögð með því að örva framleiðslu ákveðinna fruma í ónæmiskerfinu. Þessi aðferð getur að öllum líkindum komið að gagni í baráttunni gegn fleiri ofnæmissjúkdómum og þá ekki síst sjálfsofnæmi eins og MS. Ofnæmisvaldurinn, prótein sem eru til staðar í kattahárum, er afar smáar eindir sem berast auðveldlega í öndunarveginn. Þátttakendur í rannsókninni voru sprautaðir með svipuðum próteinum sem í vantaði helsta ofnæmisvaldinn en gerðu það samt að verkum að ónæmiskerfið tók við sér og niðurstaðan var að ofnæmisviðbrögð minnkuðu töluvert. Læknarnir sem standa að tilrauninni vonast til þess að bóluefni gegn slíku ofnæmi verði komið innan fimm ára og jafnvel lyf í töfluformi. Í síðasta mánuði tilkynntu vísindamenn við Kaliforníuháskóla að þeir hefðu fundið aðferð til að hindra kattaofnæmi í músum með því að sprauta þær með blöndu af mannapróteini og ofnæmisvaldi úr ketti.