Eitt tonn af spiki

"Við opnuðum í september og viðtökurnar hafa verið fínar," segir Georg Ögmundsson sjúkraþjálfari í Orkuverinu sem er ný líkamsrækt í Egilshöllinni. "Traffíkin er að keyrast upp núna og á sama tíma erum við að hefja leik í samstarfi við útvarpsstöðvarnar þar sem við ætlum að losa landann um eitt tonn af spiki." Leikurinn virkar þannig að hver og einn sem missir 3 kíló mun fá verðlaun sem ekki eru af verri endanum. Georg vill ekki viðurkenna að markið sé sett of hátt enda séu allir talandi um að þeir þurfi að léttast. "Það er ekkert leyndarmál að við erum að þyngjast og samkvæmt rannsóknum erum við jafn þung og Bandaríkjamenn voru fyrir 10 árum." Samkvæmt Georg fær sá keppandi sem fer yfir tonnið sérstök verðlaun sem og sá sem missir mest. "Einu skilyrðin er að vera með kort í ræktinni. Þessa dagana erum við með tilboð á árskortum svo það ættu allir að geta verið með." Lestu meira í tímaritinu Magasín sem fylgir DV í dag.