Veira veldur frunsum

Veiran herpes simplex 1 veldur þessum óskemmtilegu útbrotum á munnsvæðinu og smitast hún auðveldlega við snertingu. Saklaus koss getur valdið smiti. Arthur Löve, yfirlæknir á veirufræðideild Landspítalans, segir fólk oftast smitast fyrst á unga aldri með tiltölulega vægum einkennum, svo sem bólgum í munni eða tannholdi. En smitið verður að jafnaði verra eftir því sem fólk smitast eldra. "Við fyrsta smit skríður veiran eftir taugaþráðum upp í taugahnoð sem er upp við heilann og situr veiran í því ævilangt. Af óþekktum ástæðum skríður hún öðru hvoru aftur niður á munnsvæðið og veldur frunsum á vörum," segir Arthur, en bætir því við að hún láti ekki á sér kræla hjá öllum og eru ástæður þess óþekktar. "Ekki er vitað af hverju hún fer af stað en það vill oft gerast við álag, svo sem við blæðingar hjá konum. Einnig er mjög algengt að fólk fái áblástur á skíðum eða í mikilli sól og birtu, en veiran getur líka látið á sér kræla alveg upp úr þurru án nokkurrar sjáanlegrar ástæðu," segir Arthur.