Lyftingar, fótbolti og dans

Af nógu er að taka hjá Kristjáni Franklín Magnús leikara þegar hann er spurður um hvernig hann heldur sér í formi sökum mikillar fjölbreytni í hreyfingum hans. "Ég er í fótbolta með hópi karlmanna sem einhvern veginn hefur lent saman. Við æfum einu sinni í viku inni og úti upp í þrisvar sinnum í viku. Ég var í fótbolta þegar ég var yngri en hann þurfti að víkja fyrir borðtennis. Ég var alltaf sendur í sveitina á sumrin og á meðan ég var að mjólka kýr voru vinir mínir að spila fótbolta með liðinu mínu, KR. Það var í þá gömlu góðu daga," segir Kristján en spurning er hvort hann sé í eins góðu fótboltaformi og hann var? "Hæfileikarnir eru enn til staðar en getan hefur aðeins minnkað. Þetta er samt ennþá jafn gaman." Kristján lætur ekki fótboltann duga og lyftir lóðum öðru hvoru. "Það er mikilvægt fyrir mig að hugsa um heilsuna í því starfi sem ég er í. Maður þarf kraft til að stunda þetta starf," segir Kristján sem náði að draga konu sína, Sigríði Arnardóttur, í danstíma í Kramhúsinu. "Við reynum að fara einu sinni til tvisvar í viku. Við höfum helst verið í samkvæmisdönsum en nú erum við í argentínskum tangó. Það er voðalega gaman að geta gert eitthvað saman fyrir utan heimilið. Það er alveg öfugt farið með okkur miðað við önnur pör þar sem það var ég sem dró hana í dans en henni leist ekkert á blikuna fyrst."