Hreyfigreining með golffimi

"Við sjáum fyrir okkur að fólk geti bætt sveifluna og lækkað forgjöfina með þessum námskeiðum. Nú, þegar búið er að lýsa upp braut uppi í Grafarholti þar sem auðvelt er að iðka æfingar þar, eftir tímana hjá okkur," segir Þorsteinn Hallgrímsson golfari sem leiðbeinir á námskeiði í golffimi sem er að hefjast í Hreyfigreiningu við Höfðabakka í Reykjavík. Námskeiðin eru tvíþætt, annar hlutinn er almenn heilsurækt undir leiðsögn sjúkraþjálfara þar sem áhersla er lögð á að styrkja hrygg í miðstöðu, fyrirbyggja bakverki, leiðrétta slæma líkamsbeitingu og gera líkamann betur undirbúinn fyrir golfið. Hinn hlutinn snýr að golfinu sjálfu og þar er farið í ýmis mikilvæg atriði. Námskeiðin standa 10 vikur og hefjast 9. nóvember. Að sögn Þorsteins er tekið á fjölmörgum þáttum sem viðkoma líkamsburðum golfarans. "Við reynum að styrkja hvern og einn þar sem hann er veikastur fyrir. Fólki hættir til að staðna á einhverjum punkti og það getur verið vegna þess að það vanti afl í únliði eða fætur, snúning í axlirnar eða teygjanleika í mjaðmirnar," segir hann og bætir við að lokum: "Við greinum vandamálið og síðan taka sjúkraþjálfarar við og vinna í því að styrkja það sem þarf."