Föstudagsbleikjur með pestó

Eftirfarandi uppskrift er létt og leikandi lystisemd sem er auðveld í framreiðslu og rosalega góð. Best notið við kertaljós, inniskó og kannski...John Mayer?

4-5 bleikjuflök

2 msk. pestó

1/2 krukka marineruð þistilhjörtu

1/4 rauð paprika (skorin í strimla)

lúkufylli af söxuðum púrrulauk

2 msk. svartar ólífur

7-8 litlar kartöflur (skornar í fjórðunga)

2-3 msk. ólífuolía

lúkufylli af rifnum osti

Dreifið 1 msk. ólífuolíu um botninn á eldföstu fati og raðið bleikjuflökunum þar á (roðið niður). Smyrjið flökin með pestói og dreifið svo þistilhjörtum, púrrulauk, papriku og ólífum yfir. Skerið kartöflurnar í fjórðunga og setjið í sér skál og veltið þeim vel upp úr 2 msk. af ólífuolíu og 1/2 tsk. grófu salti. Hellið kartöflunum ásamt ólífuolíu út á flökin og í kringum þau líka. Stráið að síðustu lúkufylli af rifnum osti yfir allt. Setjið í 200 gráðu heitan ofn og bakið í 20 mínútur. Berið fram með góðu salati.