Reykingavarnir góðar á Íslandi

Íslendingar fá hrós fyrir baráttu gegn reykingum í nýrri evrópskri rannsókn og standa sig betur en nokkuð annað Evrópuríki. Á þriðjudaginn kemur verða birtar niðurstöður rannsókna á reykingum í Evrópusambandsríkjunum og löndunum á evrópska efnahagssvæðinu. Þar er meðal annars kannað hvort, og þá hvernig, ríki fara eftir meðmælum Alþjóðabankans hvað reykingavarnir varðar. Íslendingar hafa fylgt meðmælunum nákvæmar en nokkur annar og þykja standa sig mjög vel í baráttunni gegn reykingum. Rannsóknir Alþjóðabankans benda meðal annars til þess að sé verð á sígarettum hækkað um tíu prósent minnki reykingar um fjögur prósent. Meðal þess sem kannað var var hvernig sköttum er beitt til að berjast gegn reykingum, hvernig reglum um reyklaus svæði á vinnustöðum væri háttað, hvort að barir og veitingastaðir væru reyklausir, hvernig herferðir gegn reykingum færu fram og hvort að áberandi viðvaranir væru á sígarettupökkum. Íslendingar þykja standa sig vel hvað flest þessarra skilyrða varðar, þó að hér hafi ekki verið tekið jafn hart á reykingum á veitingastöðum og börum og til að mynda á Írlandi. Innan framkvæmdastjórnar Evrópusambandsins er hins vegar rætt um að fylgja fordæmi Íra og banna reykingar á opinberum stöðum alls staðar í álfunni. Alþjóða heilbrigðisstofnunin telur að dauða fimm milljóna manna megi rekja til reykinga á ári hverju.