Líkamsrækt að spila á orgel

"Það er nú ákveðin líkamsrækt að spila á orgel, bæði fingraleikfimi og þó einkum fóta því maður reynir að láta rjúka úr pedalanum," segir Steingrímur Þórhallsson, organisti í Neskirkju, hlæjandi þegar hann er inntur eftir því hvernig hann haldi sér í formi dags daglega. "Svo brenna menn líka vel þegar menn eru að stjórna söng," bætir hann við og telur sig greinilega vera í góðum málum. Þegar nánar er grennslast kemur í ljós að Steingrímur gerir meira en sprikla í kirkjunni. Hann fer líka reglulega út að hlaupa og reynir að fara af og til í sund. En fótboltinn er í mestu uppáhaldi. "Sundið er voða gott fyrir líkamann, það hitar mann vel upp og liðkar. Það er bara svo leiðinlegt að synda og eiginlega má segja það sama um hlaupið. Mér finnst hvorugt skemmtilegt. Það er langfjörugast að spila fótbolta og ég geri það stundum en gallinn við þá íþrótt er sá að maður á það til að missa fæturna í einhvern tíma og það er slæmt fyrir mann í mínu starfi."