Ekki standa hjá og horfa á!

Í fyrra fyrir verslunarmannhelgina skrifaði ég grein sem bar titilinn: Allt nema já þýðir nei! Þar hvatti ég karlmenn á öllum aldri til að virða óskir kvenna og bað þá um að gera ekki neitt nema að þeir fengju skýrt já. Ég bað þá einnig að átta sig á því að nauðgun er óafturkallanlegur glæpur sem leggst á sálina hjá konum og körlum sem fyrir henni verða. Nauðgun getur fylgt sjálfsfyrirlitning af verstu gerð sem hefur áhrif á allt samfélagið þegar til lengri tíma er litið. Lengi hefur verið barist gegn nauðgunum undir slagorðinu: Nei þýðir nei. Ég vona að sú barátta hafi skilað árangri en betur má ef duga skal. Um verslunarmannahelgar hefur þjóðin sætt sig við ákveðinn fjölda nauðgana. Slík sátt gengur ekki! Því hvet ég alla sem ætla á útihátíðir um helgina til að hafa augun hjá sér. Þegar ég hugsa til unglingsáranna hefði ég örugglega getað stöðvað tvær eða fleiri nauðganir þar sem ég horfði á unga drengi ganga inn í herbergi hjá áfengisdauðum stúlkum án þess að hugsa meira um það. Ekki standa hjá og horfa á! Ef þú sérð eitthvað grunsamlegt á seyði skaltu láta þá vita sem geta gert eitthvað í málinu. Nauðganir ættu aldrei að vera eitthvað sem við sættum okkur við. Aldrei!