Atletico pakkaði Real saman í tíu marka leik │Sjáðu mörkin

Það var ótrúlegur leikur í International Champions Cup í nótt þar sem Atletico Madrid burstaði nágranna sína í Real Madrid 7-3.

Þeir stuðningsmenn sem gerðu sér ferð á MetLife völlinn í New Jersey í nótt fengu svo sannarlega sitt fyrir peninginn, tíu mörk og tvö rauð spjöld.

Diego Costa skoraði strax á fyrstu mínútu leiksins og hann átti eftir að bæta tveimur mörkum við áður en fyrri hálfleikur var úti. Ungstirnið Joao Felix og Angel Correa áttu einnig sitt markið hvor í fyrri hálfleiknum, staðan 5-0 fyrir Atletico í hálfleik.

Costa var ekki hættur og skoraði sjötta mark Atletico á 51. mínútu áður en Nacho náði að minnka muninn.

Á 64. mínútu sauð upp úr. Costa sparkaði Dani Carvajal niður eftir að Carvajal hafði brotið af sér. Carvajal og Costa misstu báðir stjórn á skapi sínu og fengu báðir að fjúka af velli.

Vitolo skoraði sjöunda mark Atletico á 70. mínútu en Real náði að laga stöðuna undir lokin með mörkum frá Karim Benzema og Javier Hernandez Carrera.

Allt fjörið úr leiknum má sjá hér að neðan.