Vilja skapa hvata til að beina sparnaði Evrópu­búa í fjár­festingar

„Evrópa á sparnað. Því miður liggur þessi sparnaður óhreyfður,“ sagði von der Leyen á ráðstefnu frönsku atvinnurekendasamtakanna MEDEF í París á fimmtudag.

Hún sagði tíu þúsund milljarða evra af sparnaði heimila liggja á bankainnstæðum og að stór hluti annars sparnaðar Evrópubúa væri fjárfestur utan álfunnar. Evrópa þyrfti að koma meira af þessu fjármagni í þjónustu evrópskra fyrirtækja.

Von der Leyen sagði mörg evrópsk fyrirtæki eiga erfitt með að fjármagna vöxt sinn. Verkefni strönduðu vegna þess að áhættan væri of mikil, fjármagn of dýrt eða eftirspurn óviss. Til lengri tíma þyrfti nýsköpun, aukin framleiðni og vöxtur fyrirtækja að knýja hagvöxt í Evrópu.

Reuters hefur fjallað um sömu áform og segir markmiðið með aukinni samþættingu fjármagnsmarkaða meðal annars vera að nýta betur þá tíu þúsund milljarða evra sem liggja á bankareikningum og beina meira fjármagni í fjárfestingar.

Vilja skapa hvata til fjárfestinga

Þetta er hluti af svokölluðu sparnaðar- og fjárfestingasambandi ESB. Von der Leyen sagði tillögur framkvæmdastjórnarinnar geta skilað allt að 470 milljörðum evra í auknum fjárfestingum.

Framkvæmdastjórnin hefur meðal annars viljað skapa hvata fyrir almenning til að færa stærri hluta sparnaðar síns úr bankainnstæðum yfir í fjárfestingar. Financial Times greindi frá því í fyrra að framkvæmdastjórnin hefði hvatt aðildarríkin til að bjóða sérstaka fjárfestingarreikninga með skattalegum ívilnunum og aðgangi að meðal annars hlutabréfum, skuldabréfum og sjóðum.

Fjárfestingarþörfin í Evrópu hefur lengi verið talin mikil. Mario Draghi, fyrrverandi forseti Seðlabanka Evrópu, mat í skýrslu sinni um samkeppnishæfni sambandsins að þörf væri á 750 til 800 milljörðum evra í viðbótarfjárfestingu á ári til að auka framleiðni og halda í við Bandaríkin og Kína. Reuters fjallaði ítarlega um skýrsluna þegar hún kom út.